Coronavirus: sa Corona de Logu iscriet a su guvernu sardu

Nova pro su guvernu sardu pro su chi pertocat s’emergèntzia Coronavirus

No est galu tardu. Sa Corona de Logu, assemblea de sos amministradores locales indipendentistas sardos, ammentat a su Presidente Christian Solinas e a su guvernu de sa RAS chi no est galu tardu pro dare sustennu a sos sardos impignados in s’emergèntzia Coronavirus.

Serbint sèberos detzisos e a manera immediata luego in ambitos diferentes.

Su raportu cun su personale de sos ospidales, focolaju printzipale de incubatzione de s’epidemia de su Covid-19, cheret sanadu pro mèdiu de sa frunidura de sos Dispositivos de protetzione individuale (Dpi) chi mancant e chi sunt istados recramados prus de una borta.

Su raportu cun sa populatzione cheret sanadu pro mèdiu de una comunicatzione publica crara, fitiana e trasparente, pro bìnchere su sensu de discunfiantza subra de sas istitutziones regionales chi, die cun die, crèschet in sa tzitadinàntzia.

Su raportu cun sos sìndigos e cun sos amministradores comunales, chi sa Corona de Logu rapresentat, cheret sanadu ponende comente primu cosa a disponimentu sos datos de sos positivos e de sos contagiados de cada bidda. Solu gasi sos sìndigos ant a pòdere acumprire in prenu sas funtziones issoro de massima autoridade de sa sanidade de su territòriu. Non est galu tardu pro fàghere totu custu.

E est giai s’ora, semper e cando, de progetare remèdios a su dannu econòmicu cajonadu dae sa serrada temporanea de totu sas atividades imprenditoriales. Pro custu sa Corona de Logu tenet ideas medas subra de unas cantas misuras chi, segundu sos bisòngios de cada Comunu, ant a permìtere a totu sas Domos Comunales de agiudare sas produtziones e sas professiones de su territòriu corfadas dae su Covid-19 e dae sas restritziones chi nde sunt benidas.

In sas dies imbenientes amus a imbiare unu elencu cumpridu a pitzu de custas mesuras a totu sos membros e a chie si siat cheret sighire custa forma de guvernu. Amus a frunire fintzas carchi ipòtesi de traballu pro una economia de su tempus benidore fundadu cun cunditziones diferentes dae sas chi ant mòvidu su mundu nostru imprenditoriale finas a oe.

Si narat in prus logos chi custu no est su tempus de polèmicas lanosas. Semus de acòrdiu. In custu momentu, comente amministradores, nos depimos cuntzentrare subra de sa cura e sa subravivèntzia de sos paesanos e cuntzitadinos nostros.

Est s’ocasione de seguru pro torrare a leare su meledu subra de su costu de sa dipendèntzia de sos sardos e de sa Sardigna dae sos sèberos de su guvernu chi est in Roma, a tesu de s’Isula. Comente ant dimostradu sos fatos, medas de sas detzisiones de importu mannu de custas chidas las diamus àere pòdidas pigare in Casteddu, cun modos e tempos nostros, incumpatìbiles cun sos modos e tempos de sa polìtica istatuale italiana. Amus a torrare chitzo subra de custu argumentu.