Sciòperu e blocu de is scrutìnius in coranta crassis a su "Primu Levi" de Pitz'e Serra de Cuartu

(IlMinuto) - Casteddu, 13 de su mes'e làmpadas - Sa Scola Nosta tenit cincuantacuàturu crassis, dexi funt is cuintas e no si podint blocai e cuàturu crassis is scrutìnius dhus depint fàiri sàbudu 13, ma custa no est dia de sciòperu e intzandus no dhus podeus blocai.

Seu lòmpius a oi a pustis de totu unas cantu cosas fatas contras a sa "Buona Scuola", unu strupiu pensau e cuncodrau po sa Scola Stadali Pùbriga de su guvernu Rentzi. Est custa s'ùrtima ancada contras a sa Scola dimugràtiga de sa constitutzioni e de sa paxi.

Mancu s'arreforma Gelmini fiat lòmpia a pensai aici in mannu po ndi sciusciai sa Scola Stadali Pùbriga e dha fàiri torrai a su paris de sa scola privada: diplomifìcius a pagamentu po chini si dhu podit permìtiri. A partiri de sa Gelmini, cun su guvernu Berlusconi, chi iat smenguaus is matèrias professionalizantis, e po nosu ca seus unu cumerciali iant segaus is oras de matèrias de importu che: diritu, econumia aziendali, matemàtiga, lìnguas e artìstiga e a s'acabbu fiant arrennèscius a nci bogai de sa scola 120 milla precàrius. A pustis seghendi is siendas a is scolas e incotendi is scientis in crassis pudhaxus fintzas a lompiri a trinta e a prus de trinta scientis a aula. Narànt intzaras ca no iant lincentziau nemus, ellus, is precàrius no fiant mai stètius assumius e sichè no arrisurtàt ca dhus iant licentziaus.

Cun su dinai arrisparmiau, 8 milliardus, cudhu guvernu iat cumentzau a ordinai is cassabumbardieris F35.

Su stadu nd'est bessendi de sa scola, cumenti de sa previdèntzia sotziali, e de is benis cumunus: àiri, àcua e ambienti. Lassendi sa manu lìbbera e is goràngius a is privaus.

Cun su Ddl sa "Bona Sola", dhu tzerriant aici is arromanus, eus a lòmpiri faci a su 2020 e su stadu at a smenguai s'agiudu e s'interventu cosa sua de àterus 8 milliardus. A palas de su progetu de sa "Bona Sola" nci funt unus cantu poderi fortis de s'ecunumia capitalìstiga cuntinentali e calincunu intelletuali lacaju cosa insoru.

Immoi ca sa Corti Oropea at cundennau s'Itàllia a assùmiri is precàrius, frassus precàrius, ca nc'est genti trabballendu fintzas de prus de 20 annus in sa scola e sèmpiri precàrius est. Su guvernu bolit arricatai totu su personali chi trabballat in sa scola, professoris, bidellus e aministritivus, narendi e ameletzendi o passat totu su Ddl doghinou no si faint is 100 milla assuntzionis, de is giai ex 150 milla promìtias.

Eus fatu duus atòbius po ndi pesai unu Curdinamentu de is docentis, eus cuncodrau una mailing list, unu flash mob in pratza de su Cramu, una manifestada de sa sedi Rai a Pratza de su Cramu e àteras cositedhas chi seu apariciendi po custa diris a bènniri. A Pitz'e Serra eus postu trexi striscionis in su muredhu de cresura de sa scola e si ndi fadeus biri duus.

francudefabiis