Tàtari: “Limba e Libros in su Museu Sanna”, valorizare sa limba sarda e sas variedades alloglotas de sa Sardigna

(IlMinuto) - Casteddu 20 de martzu - “Limba e Libros in su Museu Sanna” est su tìtulu de sa manifestatzione chi organizat in Tàtari su Servìtziu Limba Sarda de s’Assessoradu a s’Istrutzione Pùblica de sa Regione Autònoma de Sardigna cun s’Isportellu Linguìsticu Regionale pro sa limba sarda e catalana. "Tres addòbios - si ligit in su comunicadu - chi, gràtzias a sa collaboratzione cun su Ministèriu pro sos benes e sas atividades culturales, s’ant a fàghere in su Museu Natzionale “A. Sanna” de Tàtari". “Limba e Libros in su Museu Sanna” previdet diferentes apuntamentos pro valorizare sa limba sarda e sas variedades alloglotas de sa Sardigna chi si còllocant in una rete importante de initziativas chi su Servìtziu promovet dae medas annos. Primu apuntamentu: giòbia 20 de martzu, sa sala de sas cunferèntzias de su Museu Natzionale “A. Sanna”, carrera de Roma 64 a sas 17.30, cun sa presentada de s’ùrtimu libru de Pàulu Pisu “Gli ultimi pastori sardi? Storie, testimonianze, prospettive”. "Durante s’initziativa - si ligit in sa nota - at a dare sa testimonia sua carchi pastore de su territòriu". A sa manifestatzione at a èssere presente s’autore de su libru Pàulu Pisu. A pustis de sos saludos de Gabriella Gasperetti, diretora de su Museu, at a moderare su dibàtidu Juvanna Tuffu de s’Ufìtziu regionale de sa limba sarda. Prevìdidos sos interventos de s’iscritore Pàulu Pillonca e de Batista Cualbu, Presidente regionale de sa Coldiretti. A "Limba e libros in su Museu Sanna" s’at a esibire su coro a tenore “Su cunsonu tiesinu”. Apuntamentos imbenientes de sa manifestatzione: giòbia 27 de martzu a sas 17.30 "Les mies mans" libru de poesias de Antoni Canu, editziones Nemapress e giòbia 3 de abrile a sas 17.30 "Istòria de unu cau Marinu" tradutzione in sardu de su libru de Luis Sepulveda "Storia di una gabbianella e del gatto che le insegnò a volare", editziones Papiros