Pranu Paisagisticu de is sardus: sa bulladura de su Fronte Indipendentista Unidu

(IlMinuto) – Casteddu, 28 de su mesi de ladàminis - Totu o casi totu  est permìtiu in campagna eletorali, e su guvernadori de sa Regioni sarda circat de si giogai is cartas suas. Est aici chi donendiddi unu sabori druciatzu, lamat su Ppr nou "pranu paisagisticu de is sardus". Peròu, s'ogu atentu de is indipendentistas de su Fronte Indipendentista guastat is giogus de su Presidenti de Regioni Autònoma de Sardigna. "Su Fronte Indipendentista Unidu - si ligit in d-una nota de imprenta - si nd'agatat de su fatu ca Ugu Cappellacci, po mori de is eletzionis benientis est cun craresa perdendi sa passéntzia i est circhendi de recuperai cunsensus eletoralis po fai scaresci is cincu annus de inértzia de sa giunta sua chirchendi de fai aprovai unu pranu paisagisticu, tzerriau cun demagogia 'de is sardus'". "No podeus acetai a nisciuna manera - pretzisat su comunicau n°3 - ca po is interessus eletoralis de una perra si permitat de coberri de ciumentu sa terra nostra, afirmendi puru de dda bolli amparai". Difatis, po su Fronte, in primu linia in sa difesa de s'ìsula, est assolutamenti foras de contu "ca s'isvilupu ecònomicu de sa Sardigna passit po su ciumentu e su consumu de sa terra". "Si diaderus si bolint fai is interessus de is sardus - concluint is indipendentistas de su Fronte - imbecis de favoressi sa speculatzioni s'investat diaderus asuba de s'edilitzia populari, poita chini no si podit permiti una primu domu raramenti at a agatai giuamentu in su fàbricu de villetas noas in sa costera".