S’istória de Elisabetta una profesoressa chi bisat scéti de imparai

(In Tempus de Crisi) – Casteddu, 14 de su mesi de martzu - Dipromada in su Litzeu Issentíficu e laureada in sa Facoltadi de Filosofia de s'Universidadi de Casteddu, a pustis de sa laurea Elisabetta, classi 1977, at pigau duas abilitatzionis puru. Una po s'imparamentu de filosofia e istória e un'àtera po imparai a chini est disvantagiau. Unu caminu, su de sa picioca de Sètimu, chi dd'at lassada a metadi de istrada, "un pagu lòmpia ma mai lòmpia", si narat issa etotu candu s'acrarat ca su caminu suu est sèmpiri de cunfirmai. Est prexada de sa laurea sua, chi dd'at obertu ecas e traballus chi no iat postu in contu, mancai su bisu suu, su de fai sa profesoressa, de annu in annu parrit sèmpiri prus atesu. Arrexonendi de laureas e laureaus, sa profesoressa precària de Filosofia at afirmau ca po issa unu de is problemas mannus chi ferrit a chini at istudiau est su númeru mannu de laureaus, chi portat a pediri sa laurea po traballus chi primu si fadiant cun sa terza média scéti.Custu nuu portat a s'esclusioni de is laureaus po is traballus prus simplis. Un'àteru mabi chi est fadendi dannus medas funt is amaistramentus e is fainas chi si pedint primu de su traballu e chi durant de prus de su cuntratu de traballu etotu. Sighendi a allegai est bessiu a pillu ca un'àteru arragu de is laureaus est s'edadi, in su sensu ca unu cristianu laureau de pagu tempus pedit una paga diversa, prus pitia, naraus chi s'acuntentat a petus de sa paga chi ddi spetat, chi est sa chi pedit unu laureau unu pagu prus mannu. Custa est una de is crais chi serrat is ennas de su mundu de su traballu a chini tenit su títulu de meda primu. Elisabetta no pedit sa luna, ma comenti medas de is collegas suus chi oi no tenint nudda o pagu nudda, bolit scéti imparai. "Imparai e sciri ca at a arribai unu stipendiu" est su bisu mannu chi sa profesoressa de Sètimu fait po su tempus benidori suu.

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda