Documentu: petitzioni promòvia de aMpI po pediri s'imparu de su sardu in iscola
A su Dirigente de s'iscola_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
Nois mamas e babbos de sos pitzinnos iscritos in custa iscola, in sa classe_ _ _ _ _ _ _ _ _ _ _ _ _
- cunsiderende su chi b'at iscritu in sa lege italiana 482 de su 1999, mescamente in s'artìculu 9 chi reconnoschet su deretu de sos sardos de impreare sa Limba Sarda iscriende e faeddande in totu sos ufìtzios de sas amministratziones pùblicas de Sardigna, fancu sos ufìtzios de sa Politzia e de s'Esèrtzitu.
- cunsiderende su chi narat s'artìculu 4 de sa lege 482/99 chi permitit chi s'impreet su sardu puru pro imparare sa didàtica in totu sas iscolas maternas, elementares e mèdias in su territòriu sardu: sas iscolas devent isseberare, fintzas intendende su chi cherent sas famìlias, comente imparare sa Limba Sarda, ponende mente a sa lege 59 de su 1997, chi regulat s'autonomia didàtica e organizativa de sas iscolas.
- cunsiderende chi su paràgrafu 5, artìculu 4, de sa lege 482/99, narat chi faghende s'iscritzione, sas famìlias narant si cherent chi s'iscola lis imparet su sardu a sos fìgios.
- cunsiderende chi sa lege regionale 26 de su 1997, in sos artìculos 17 e 20, previdit chi sa Regione Sardigna pòngiat su dinari suo pro finantziare sos cursos fatos dae sas iscolas pro imparare sa cultura e sa limba de Sardigna e pro finantziare s'isperimentatzione de sos progetos.
- cunsiderende chi sa lege regionale 3 de su 2009, in s'artìculu 9 comma 10 paràgrafu b, ponet 50.000 euros a s'annu pro isperimentare, in totu sas iscolas, s'imparòngiu de su sardu e in sardu in oras de letzione; dinare chi sa Delibera 32/65 de su 24 de trìulas de su 2012 de sa Giunta Regionale at aumentadu a 100.000 euros
- cunsiderende chi in sos annos colados ant fatu cursos isperimentales pro imparare su sardu e in sardu in oras de letzione in paritzas iscolas elementares, mèdias e superiores de Sardigna, e chi sa Regione e sas Provìntzias ant dadu sos finantziamentos a sas iscolas pro pagare sos mastros, su materiale didàticu e totu su chi sas iscolas ant gastadu pro fàghere custos cursos, comente b'est iscritu in su Pianu de tres annos de sa Regione pro sa Limba Sarda 2011-2013 e in sa Delìbera 26/6 de su 24 de maju de su 2011 de sa Giunta Regionale.
- cunsiderende chi sos cursos in sardu chi sas iscolas faghent cun su finantziamentu de sas leges regionales 26/97 e 3/09, devent èssere fatos dae s'insegnante titolare o dae un'àteru mastru (in ogni manera s'insegnante chi faghet su cursu devet ischire su sardu nessi a su livellu C1, autocertificadu dae issu etotu ponende mente a sa tabella europea QCER) e chi s'insegnante devet impreare su sardu ebbia faghende su cursu (cale si siat sa matèria chi imparat) comente narant s'avisu pùblicu de s'Assessoradu Regionale pro s'Istrutzione Pùblica chi pertocat s'isperimentatzione de s'imparòngiu de sa Limba Sarda in oras de letzione pro s'annu 2012-2013, e chi àplicat sa Delìbera de sa Giunta Regionale 32/65 de su 24 de trìulas de su 2012. Comente narat s'avisu giai mentovadu e comente ant fatu in sos annos colados, sos progetos los issèberant faghende una graduatòria chi leat in cunsideru unos cantos critèrios: a) àteros cursos chi s'iscola at giai fatu; b) tìtulu de su mastru (FILS o un'àteru tìtulu chi pertocat sa didàtica de sas limbas); c) àteros cursos in sardu chi su mastru at fatu in iscolas, universidades o àteras istitutziones; etc.
- cunsiderende sa litera chi su Dirigente de s'Ufìtziu Regionale pro sas Iscolas Enrico Tocco at mandadu a totu sas iscolas elementares e mèdias de Sardigna (Prot. AOODRSA.REG.UFF. n. 640) consigiende·lis, pro pònnere mente a sa lege 482/99, de agiùnghere s'optzione pro isseberare s'imparòngiu de su sardu in sos mòdulos pro sas iscritziones a s'annu 2013-2014, mandende·lis paris cun sa lìtera fintzas un'esèmpiu pro lis fàghere bìdere comente deviant agiùnghere s'optzione a sos mòdulos.
Amus bidu chi custa iscola no at postu s'optzione pro isseberare s'imparòngiu de sa limba sarda in sos mòdulos pro iscrìere sos pitzinnos a s'annu 2013-2014, mancari custu siat unu deretu de sas famìlias riconnotu dae sa lege dae batòrdighi annos.
Pro custu, de idea nostra e ischende chi s'iscola podet otènnere su finantziamentu de sa lege regionale 3/09, si at a presentare in su tempus dèghidu unu progetu chi rispetet sas regulas de su bandu,
pedimus chi pòngiant s'imparòngiu fintzas in Limba Sarda pro s'annu 2013-2014 in sa classe de fìgios nostros.
In fatu sas firmas de sas mamas e de sos babbos de sos istudentes.