Língua sarda: Milia "sa língua est stétia sacrificada in nòmini di unu progressu fartzu"

(IlMinuto) – Casteddu, 5 de su mesi de paschixèdda - S'assessori de sa Pública Istrutzioni Sergio Milia at serrau is traballus de sa de seti Cuferéntzia regionali de sa língua chi s'est tenta in Azos su fini de cida passau afirmendi ca "Su bilinguismu est una risossa contra a sa crisi e podit essi su fundamentu po unu progetu nou de promotzioni económica, sotziali e culturali po sa Sardigna. Sa língua sarda e is variedadis 'alloglotte' depint auniri a sa genti nostra no dda depint iscrobai". In Gallùra si funt isboddiadas duas diris de dibàtidu e cunfrontus, di esperiéntzias e testimónias. Protagonistas: operadoris, ativistas, militantis, atoris, musicistas, puetas e iscritoris chi dógnia diri lotant in nòmini de sa língua de su popólu sardu. Su filu condutori de is traballus divídius in cuàturu setzionis est stétiu - comenti si ligit in su comunicau de imprenta - "assegurai sa subravivéntzia de sa língua sarda istórica, impari a is àteras minorias linguìsticas chi ddoi funt in Sardigna: su catalanu de s'Alighera, su ligure de Carlofòrte e Cal'e Sèda, su turritanu e su galluresu, chi at tentu unu tratamentu e atentzionis de riguardu biu sa domu isceberada ocannu". Su divulgamentu sighiu de banalidadis, pregiuditzius e disinformatzioni e de s'iscassa atentzioni de is média funt is problemas bessius a pillu siat in sa sessioni de sàbudu a mangianu dedicada a su teatru, siat in sa dedicada a su mundu de is prémius literàrius de poesia de sàbudu a merì. De is duus atopus est apillau puru s'abisóngiu de torrai a promòviri e de rennovai is cànonis de métidu a custus temas. Sa diri de serradura, dedicada totu a sa política linguìstica e a su movimentu de is ofítzius linguìsticus, at tentu comenti arrasurtau de is traballus su cumprimenti de propostas operativas de presentai a sa Giunta e a su Consillu Regionali po un'acotzu prus pretzisu in is cunfrontus de is azionis culturalis de importu prus mannu. 150 is reladoris chi ant fueddau in is duas diris serradas de s'interventu de s'assessori Milia, chi manifestendi sa disponibilidadi a pigai is diversus apellus at afirmau ca "eus postu in campu azionis meda contra a un'Istadu imagliatzu chi in s'úrtimu annu at circau de irminorigai cun dógnia médiu a sa língua sarda, ma comenti classi dirigenti sarda, comenti Giunta, comenti Consillu Regionali no podeus pediri a Roma un'amparu de sa língua chi nimancu nos donaus". Imprefinis sa precisatzioni: "creu chi, de una parti su Movimentu linguìsticu depat fai propostas cuncretas, de s'àtera su Consillu Regionali depat essi atentu a is apellus de agiudu finantziariu puru a is políticas linguìsticas, de custu cumpartu culturali de s'ísula de importu mannu".

Fotografia de DaffyDuke. Pigada de Flickr