In Ispagna est lota de classi. Is minadoris sardus a is collegas ispagnolus: "seus cun bosàterus e seus de acórdiu cun su tipu de lota chi seis fadendi"

(IlMinuto) – Casteddu, 27 de su mesi de làmpadas - Funt pagu prus de 10milla is minadoris de su craboni chi in Ispagna gherrant contra a sa bruschesa de su dinai liau de su bilantzu de su guvernu Rajoy po pagai su dépidu de is bancas e chi ant a fai milla e prus de milla lissentziamentus. Sa protesta, chi at aguantau diversus atacus coritostus e arrebecus, est cumentzada a sa fini de su mesi de maju passau cun d-unu sit-in in is metropolitanas e sighit oi cun dógnia médiu chi abisongiat e chentza de pàsiu, poita est netzessàriu a si difendi puru de is iscontrórius de sa Guardia Civil. S'apógiu e sa solidariedadi arricius de is minadoris de s'Ispagna de tramuntana at propassau is lacanas ispagnolas. Intre is diversus collegas, is sardus de sa Carbosulcis, chi s'intendint acanta de sa lota de is collegas insoru i espressant solidaridadi cun d-unu comunicau de imprenta chi tenit comenti data sa de su 26 de su mesi de làmpadas de su 2012: "Espressaus comenti minadoris Carbosulcis, totu sa solidariedai nostra a is Minadoris Ispagnolus in lota in custas diris, po da difesa de su postu de traballu insoru […] s'acostat - pretzisat sa nota - una traditzioni de lota chi in calencuna circustàntzia s'at biu comenti furriadroxu po sa classi operàja mondiali, bastit pentzai a is lotas mannas de is Minadoris de su Surcis in totus custus annus, cumetzendi de Bugerru e sighendi ainnantis, e a is lotas de is annus '30".