Buníficas fantàsima: in Sa Madalena "su mercúriu est dexi bortas prus artu de cussu chi iat a depi essi"

Ascurta custa nova

(S’úrtima nova) – Casteddu, 29 de su mesi de fiàrgiu – Impestadura manna in su mari de Sa Madalena, aundi, mancai ddoi siant stétias is buníficas costadas pagu prus de 30 milionis de euru e determinadas agoa de is traballus de su G8 mancau, si registrat ai custu mamentu preséntzia de prumu, mercúriu e "idrocarburi". A oi funt 12 is étarus apitzus de is calis tocat a intervenni, ses in prus a petus de su passau. "Est un'impestadura spainada in su territóriu in modu irregulari" - pretzisat, in s'atopu de cida passada cun is giornalistas, su Diretori de su dipartimentu de Tàtari de s'Arpas Antoni Furesi, un'atopu tentu po definiri comenti funt is cosas. Su spricullitu, chi andat a innantis de duus annus e prus, bit spreculitaus po impestadura ambientali, fartzu e àterus riatus is rapresentantis de s'impresa chi sa Protetzioni civili, intzaras ghiada de Guidu Bertolaso, iat intregau s'incàrrigu de bunificai su tretu de mari de s'ex Arsenali, e is ditas de subapaltu chi iant traballau po su G8 mancau de su 2009.Acabadas is campionaduras a mari, sa Prucura at a avreguai puru su stadu de is arenàrgius. In su trastempus perou est stétia oberta una segunda inchiesta asuba de is buníficas a terra (Main Center, ex Arsenali i ex ispidali de sa Marina Militari) e apitzus de is costus tentus de su Stadu. "A su mamentu funt stétias spreculitadas tres personis - at pretzisau su sostitutu procuradori de su Tribunali de Tèmpiu Ricardu Rossi - ma sa situatzioni iat a podi mudai". A custu puntu sa pregunta benit naturali: ita cuant is buníficas fantàsima? E bosàterus ita ndi pentzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda