Ispidali de Tièsi, is síndigus de su Mejlogu difendint s’istrutura, aMpI: “Serraus is serbítzius fundamentalis”

(IlMinuto) – Casteddu, 11 de su mesi de gennàrgiu - Su Mejlogu difendit s'ispidali de Tièsi. Lúnis, in sa saba Sassu de su comunu in provìntzia de Tàtari, is 16 síndigus de unu territóriu chi tenit pagu prus de 20milla ànimas ant arremaciau un'aterà borta su no a sa serradura de s'istrutura, in d-una batalla cumentzada giai in su 2010 cun s'arregorta de milli e prus de milli adesionis a unu comitau de protesta e cun s'imbiu de una lítera a su chi furiat insara su ministru de sa Sanidadi, est a nai a Fazio. Lúnis in Tièsi ddoi furiat puru s'assessori regionali de sa Sanidadi, Simona De Francisci. Sa rapresentanti de sa Giunta regionali at assegurau ca s'ispidali "No at a serrai, ma antzis at essi afortiau". Su 2 de su mesi de paschixèdda passau at perou serrau su repartu de Mexina, cosa chi at fatu nasci unu comitau de lota nou. Asuba de sa chistioni fueddat cun d-una nota su diretivu natzionali de aMpI, presenti a s'assembrea. "Sa morti a pagu a pagu po allupamentu de s'ispidali - si ligit in su comunicau de imprenta - at tocau totus is serbítzius chi fadiant de s'istrutura de Tièsi unu tzentru de prevenimentu, assistu e cura sanitària fundamentali in su Logudoru […]. De indipendentistas no podeus no acotzai e donai fortza a chini in su territóriu e in is comunidadis nostras difendit is diritus fundamentalis nostrus".