“Benitorrau Bruno!”. Sàbudu assembrea in Tàtari. Is comunicaus de ProgRes, Prc, “Sinistra Popolare” e Askapena

(IlMinuto) – Casteddu, 24 de su mesi de totussantus - Sa Sardìnnia est pronta a imbratzai a Bruno Bellomonte. Sàbudu a mangianu a is 10.00 ddoi at essi un'assembrea pública ananti de s'istatzioni ferruviaria de Tàtari, logu de traballu de su dirigenti de a Manca pro s’Indipendentzia. "Totus - si ligit in d-una nota fata connosci de aMpI - ant a tenni sa possibilidadi de pigai su fueddu, de donai sa solidariedadi a su dirigenti natzionali nostru e de chistionai impari a issu e impari a is dirigentis de A Manca pro s'Indipendentzia de comenti sighiri sa batalla contra a s'assétiu de su movimentu indipendentista e in difesa de sa demogratzia bera". A pagus diris de sa senténtzia de assolutzioni pronuntziada de sa primu Corti de Assise de Roma sighint a arribai is comunicaus chi espressant prexu mannu po sa liberatzioni de assolutzioni de Bellomonte agoa de duus annus e mesu de presonia preventiva. "Mancai sa cuntentesa - scrirint is 'Comunisti–Sinistra Popolare' - si benint a conca unus cantu de preguntas: chini at a torrai a custu ómini innotzenti, chi tenit sa nexi scéti de amai meda sa terra sua e su pópulu suu is 29 mesis de vida? Si boliat ferri s'ómini e sa bidea chi in su mamentu s'ómini arrapresentàt?". Puru su Prc si ndi prexat po Bellomonte. "'Rifondazione Comunista' – si ligit in d-una nota - pigat parti a s'allirghia po sa liberatzioni de Bruno Bellomonte, militanti comunista e indipendentista chi no at incrubau sa shina nimancu in custus 29 mesis de presonia mala, vitima de una trassa légia e de un'aprofitu de poderi chi nd'at permitiu s'inserradura atesu de sa Sardìnnia, de sa família e de is cumpantzus suus". Omar Onnis, presidenti de ProgRes, espressat "satisfatzioni e consolu po sa fini bella de cust'acuntéssia legali". Ma sa solidariedadi a Bellomonte trisinat puru is àteras natzionis chentza de istadu, cun comunicaus de sa manca indipendentista Cossa e de s'Askapena basca. "No si ndi scaresceus - si ligit in sa nota de Askapena - ca Bruno Bellomonte est Stétiu scicutau po prus de duus annus cun acusas fratzas, est stétiu stresiau illegalmenti de sa terra sua i est stétius lissenziau cun malesa de su própriu traballu. Ma oi est su mamentu de imbiai un'abratzu mannu a Bruno".