Protzessu Portovesme srl: a ispantu Gioacchino Genchi abogau de sa difesa.Sit in de is "Carlofortini preoccupati"

(IlMinuto) – Casteddu, 5 de su mesi de ledàminis - At a sighiri su 15 de su mesi de totussantus su protzessu a su responsàbili de su sistema de gestioni ambientali de sa Portovesme srl e a sa responsàbili de sa gestione arrefudus de su mantessi istabilimentu. Custa genti est stétia acusada de ai ordinau s'interramentu abusivu de deximilla metrus cubus de arrefudus industrialis de s'azienda - 15.00 tonnelladas de arrefudus toscus e noxilis - in is tretus de Sètimu, Serramanna e asuta de s'arruga de s'ispidali Businco, in Casteddu. In su mangianu de ariseru iat a essi depia lompi sa senténtzia, ma in s'àula est aparessiu Gioacchino Genchi, su consulenti de s'autoridadi giuditziària giai famosu in matéria de intercetatzionis telefonicas, imoi diventau abogau.Intrau a fai parti de sa difesa de is duus dirigentis de sa Portovesme srl, con una d-una chistionada de duas oras Genchi at pediu a su giugi de no pigai in cunsidériu un'intercetatzioni pagu crara de s'acusa. Su Gup at arreusau sa dimanda, annoendi su protzessu a sa metadi de su mesi de totussantus. Puru ariseru, a faci de su tribunali s'est tentu unu sit in aprontau de su Comitau "Carlofortini preoccupati". A sa protesta contra a sa Portovesme srl ddoi furiant puru rapresentantis de Sardigna Natzione, de aMpI, e de is Birdis e de s'assótziu Adiquas e su consilleri provintziali Angelo Cremone.