Militarizatzioni. Zuncheddu: “Asuba de Cuirra narais su fratzu”

(IlMinuto) – Casteddu, 26 de su mesi de cabudanni - Su stadu italianu no at a spendi nimancu un'euru po sa bonífica de Cuirra a pustis de 50 annus de sperimentatzionis militaris. Ddu at acrarau mélcuris passau su sutasegretàriu a sa Difesa, Giuseppe Cossiga, arrespundendi a un'interrogatzioni parlamentari presentada de Amalia Schirru (Pd). Po su rapresentanti de su Guvernu Berlusconi no ddoi est nisciunu acàpiu intre is fainas militaris e is patologias e is istrópius in sa genti de su logu e in is animabis. Nimancu un'euru. Pagu importat si su 65 po centu de is pastoris (dexi allevadoris) in d-unu tretu de 2,7 chilómitrus de sa basi - comenti ant amostau de is primus de s'annu is datus pigaus de is veterinàrius de is Asl de Casteddu e de Lanusè - est corpiu de tumoris grais. Asuba de sa chistioni fueddat Claudia Zuncheddu, consilleri regionali indipendentista. "Su pranu de osserva asuba de s'impestadura chi faint is esercitatzionis militaris in su Poligonu de Cuirra - scririt Zuncheddu - iat a amostai ca su poligonu prus mannu e prus abitau de Europa po is sperimetatzionis asuba de is esplosivus est puliu". "Po is síndigus e s'assessori Liori - narat Zuncheddu - su Poligonu iat ai donau saludi e benistai po s'ambienti, po is militaris e poi is tzivilis. Ma is datus fueddant de impestadura de su territóriu, maladias e morti po óminis e animabis". "Naturalmenti - concluit sa rapresentanti indipendentista - est craru ca totus funt in su mirinu de su magistraus Fiordalisi, chi spricullitat, e po medas s'annuntziat su crìmini de falso ideologico'", su chi fait chini - acrarant is líburus de Diritu - "afirmat in d-un'atu públicu fatus chi no funt berus".