Keller: una cida de ocupatzioni po salvai su traballu. Sa solidariedadi de su Prc

(IlMinuto) – Casteddu, 9 de su mesi de cabudanni - Est lompia a fai una cida s'ocupatzioni de su fàbricu Keller de parti de is operàjus chi gherrant po salvai s'aziendha e prus de 300 postus de traballu agoa de sa raiadura de un'órdini de 15 milionis de eurus e sa dimanda de su pagamentu de una penali de àterus 10 milionis de parti de Trenitalia. Asuba de sa chistioni at chistionau Laura Stochino, segretàriu regionali de su Prc."Su Prc - at scritu Stochino - at a abarrai fintzas a s'úrtimu a su costau de is traballadoris e de is tzitadinus de su territóriu acotzendi sa lota chi ia ant a bolli mandai ainnantis po defèndiri a su traballu a su tempus benidori de sa produtzioni de Biddacidru e de sa Provìntzia". "Su guvernadori Cappellacci - at precisau su segretàriu Prc - fatzat intendi sa boxi sua in Roma amanera chi su Stadu no permitat sa fini de sa Keller". Mércuris is amministradoris e is segretàrius tzitanus de su Prc de su Campidanu de Mesu ant atopau a is traballadoris. De s'ambasciada fadiant parti Simona Lobina, assessori provintziali a su Traballu de su Campidau de Mesu, e Lorena Cordeddu, assessori a su Traballu de sa Provìntzia Casteddu". "Custa contienda Keller - at aciuntu Cordeddu - no est scéti de su Campidanu de Mesu, funt difatis medas is traballadoris residentis in provìntzia de Casteddu, est netzessàriu duncas su trisinamentu de is istitutzionis puru foras de su Campidanu de Mesu".