Keller: is operàjus ocupant sa 131. Sa solidariedadi de sa Provìntzia de Casteddu

(IlMinuto) – Casteddu, 13 de su mesi de cabudanni - Si fait sèmpiri prus forti sa gherra de is traballadoris de sa Keller de Biddacidru po salvai s'azienda de sa criadura, agoa de su determinu de Trenitalia de scancellai un'órdini de 15 milionis de eurus. Ariseru a mangianu 150 operàjus ant manifestau po un'ora in su tretu de sa 131 acanta de sa scambilladura de Seddori, arrallentendi su tràvigu in s'arruga printzipali de sa Sardìnnia. Sa protesta at arriciu sa solidariedadi de is camionistas e de is ghiadoris. In su merì s'assessori regionali de s'Industria, Alessandra Zedda, at fissau po gióbia chi benit a is 9.00 un'atóbiu in s'arburada Trentu cun sa participatzioni de sa Sfirs, de is sindacaus, de s'azienda e de is istitutzionis de su Campidanu de Mesu. In is diris passadas sa lota de is 320 operàjus de sa Keller iat arriciu puru sa solidariedadi de su presidenti de sa Provìntzia de Casteddu, Graziano Milia, e de s'assessori provintziali de su Traballu, Lorena Cordeddu. Cordeddu donat is crupas a sa Regioni Sardìnnia, chi - narat - "at ammostau de no tenni s'autoridadi netzessària in is cunfrontus de su guvernu natzionali e de Trenitalia".