Referendum: 850milla sardus serrant s’istrada a su nucleari. Cumpostu: “De s’Ísula unu messagiu po su mundu”

(IlMinuto) – Casteddu, 17 de su mes'e maju - Sa Sardigna bullat a su nucleari. Su 15 e su 16 de su mes'e maju 880.171 sardus - su 59,49 po centu de chini tenit diritu - at participau a su referendum consultivu serrendi s'istrada a su fàbbricu de centralis nuclearis e depósitus de aremus radioativus in s'Ísula. Cun su 97,98% de is EJA contr'a su nucleari de sa Sardigna, a pagu prus de de duus mesis de s'arruina de Fukushima, si pesat unu messagiu craru a su mundu. "At essi unu messagiu mannu - cummentat su cordinadori de su Cumitau Sinonucle Bustianu Cumpostu - chi si movit de unu pópulu pitiu, chi perou tenit un' istória manna. Su messagiu 'For a world nuclear free' est scritu cun su linguàgiu universali de sa música i at arribbai a totu sa genti chi bolit un'àteru tipu de raportu cun mammai terra".

Po a Manca pro s’Indipendentzia – chi at fattu una campagna contr'a su nucleari autónoma cun diversas assembreas in totu s'Ísula - s'ésitu de su referendum est "una bitória de is fortzas indipendentistas". "Custa est - cummentat aMpI - un'istraordinària proa de fortza de su pópulu sardu chi at fiamenti decídiu de sighiri a is fortzas sanas de sa natzioni sarda mancai sa mudesa carraxera de is partidus italianus e de is sindacaus chi, linendi scéti calencuna eccetzioni isolada, ant boicotau a sa campagna". Custa invecis s'opinioni de Gianluigi Deiana de Sinistra Critica. "S'esperiéntzia pólitica fatta cun Sardigna Natzione e cun su Cumitau Sinonucle - scririt Deiana - est stetia spantosa, insolita in sa forma sua e s'at donau iscopus mannus po s'amori chi si tragat. Sa furriola de is mail chi s'est movia cun sa pesadura de su quorum aritiméticu (33%) a su quorum póliticu (60%) est stetia movia de sa dimandha generali de sighiri cun s'esperimentu, in custu mamentu connotu comenti Sutamarinu Grogu, meda de prus chi de s'ispantu prexosu po s'arrisurtau".