Lei 44 de su 1988: una pesadiglia chi torrat
(Chistionis e Opinionis) - Casteddu, 14 de su mes'e maju - Sa Regioni est pronta a pediri a is impredoris agriculus de torrai (cun is interessus) is cuntribbutus arricius de sa lei regionali 44 de su 1988, bullada de s'Unioni europea in su 1997. Una centena de notíficas de pagamentu funt stetias mandadas a is aziendhas. Is àteraslíteras, 1300 e pagus prus, funt stetias frimmadas lúnis passau de s'assessori regionali de sa Massaria, Marianu Contu, agoa de un'atóbiu cun su ministru de is Políticas agriculas Saveriu Romano. "Cun Romano - at nau Contu - eus cuncodrau un'àteru atóbiu po fuddai de is elementus críticus de sa lei 44 asuba de totus is chistionis de sa massaria nostra. In su trastempus, apu dimadhau a is ufícius de s'assessorau de frimmai s'imbiu de àteras notíficas, comenti dimandhau de is assótzius de categoria". Sa Coldiretti Sardigna est difatis pronta a gherrai. "Est necessàriu un'interventu de tipu políticu po sboddiai s'acuntéssia - at nau su Diretori generali Luca Saba in d-una cuferéntzia de imprenta - ma is tres sàbius nominaus in su tempus andau de su ministru de s'Ecunumia, de cussu de is Políticas agriculas e de sa Regioni po agatai solutzionis, no ant concludiu nudda". Po cumprendi sa chistioni tocat a torrai agoa. Prus de 22 annus fait, in su mes'e paschixèdda de su 1988, su Consillu regionali iat aprovau una lei, sa 44, chi iat donau un'agiudu importanti po s'isvilupu de sa massaria sarda. S'artículu 5 de su provedimentu iat donau sa possibbilidadi a is massàjus chi s'agantant in cunditzionis mabas de pediri mutuus cun interessus bàscius meda cun sa fiàntzia de sa Regioni. Aici is bancas dispensant, fintzas a su 1996, 118 millionis de eurus a pagu prus de 5milla aziendhas. In su 1997 est arribbada perou sa bulladura de s'Europa, chi iat declarau is agiudus illegalis e incompatìbilis cun is règulas de su mercau comunu. Sa Regioni, presidenti Fidericu Palomba, nd'iat arretirau is agiudus giai cuncedius imponendi a is imprendidoris de torrai su dinai a is bancas cun tassus de interessu fintzas a su 18 po centu. Aici po medas est cumentzada una pesaglia longa 13 annus.
E bosàterus ita ndi pensais?
Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda