Cursus: in Irgòli torrat "Sa saludi de sa natura", propriedadis e profetus de is matixeddas de su logu

(IlMinuto) - Casteddu, 23 de su mes'e maju - "La salute dalla natura" est unu cursu-butega asuba de is matixeddas de potecaria chi at essi fattu in Irgòli de Tzia Maria Carta. Maista chi at imparau a sola sa matéria, Carta in is annus est diventada sèmpiri prus cumpetenti i a oi tenit un'esperiéntzia aici manna ca dda connoscint fintzas a foras de is làcanas de sa Baronia de bàsciu. Su cursu, de 10 oras in totu, s'at a tenni una borta a sa cida a cumentzai de su 25 de su mes'e maju. In àterus tempus cicai matixeddas i ebras aromàticas po coxinai, spetzias, decotus o remedius omepaticus furiat una pràtiga fatta meda. Is propriedadis de cura de is ebras e i profetus suus, funt stetius difatis una risossa connota e tramandada de importu mannu. Cun sa boluntadi de avalorai, allogai e fai connosci is cumpeténtzias de su logu s'Amministratzioni de Irgòli - cun s'agiudu de sa Bibblioteca amiga de Irgòli, Lòcula, Oniài e Garteddi - at aprontau po su segundh'annu de fil'e pari "La salute dalla natura". Sa butega, chi s'at a tenni in sa Bibblioteca comunali de Irgòli, previdit unu màssimu de 15 scientis. Is iscritzionis, chi ant a depi arribbai in sa Bibblioteca de Irgòli, ant essi acetadas comenti arribbant fintzas a martis 24 de su mes'e maju de su 2011 (fintzas a spaciai is postus). Po scedas tocat a tefefonai a su 0784 979005