"Bolint trasformai sa centrali a biomassas in termovaloritzatori", sa solidariedadi de aMpI a sa genti de Uddusò

(IlMinuto) – Casteddu, 11 de su mes''e arbili - In su mes''e de fiàrgiu su 97 po centu de is citadinus de Uddusò ant nau de nono - in d-unu referendum consultivu - a su fàbbricu in su territóriu comunali de sa centrali elétrica a Biomassas. Cun totu chi sa boluntadi populari de frimmai is traballus de fàbbricu de sa centrali est stetia crara, s'Agripower annunciat de bolli andai ainnantis acitotu cun su progetu. Asuba de su tema fueddat cun d-una nota su Diretivu políticu natzionali de a Manca pro s'Indipendentzia, donendi "solidariedadi a sa genti de Uddusò". "Is citadinus de Uddusò - si ligit in d-una nota - ant cumprendiu beni meda ca apabas de custu progetu ddoi est s'obbietivu de trasformai sa centrali a biomassas in d-unu termovaloritzadori po abbruxai s'àliga de Terranòa e puru de àterus logus. Custu iat a ponni in perígulu is terrenus de Uddusò e cussus de is biddas chi funt a ingíriu de custa [...]. Sa saludi púbblica de is sardus est e depit essi asuba de dógnia interessu o profetu púbblicu o privau". "Chi ddoi fessat abbisóngiu - precisat su Diretivu - a Manca pro s'Indipendentzia at essi in is terrenus de Seau acanta de is citadinus de Uddusò e is biddas lacanantis po difèndiri sa terra nostra de cust'àteru abbusu".