"Sindrome de Quirra" Cgil: "Tocat a frimmai cussu chi si fait in su Poligonu". aMpI: "Teniant arrexoni is indipendentistas"

(IlMinuto) - Casteddu, 1 de su mes''e martzu - "A pustis de is úrtimus isvilupus chi si funt tentus cun is spricullitus asuba de Quirra est ancora prus apretosu frimmai a is atividadis de su Poligonu". Est cantu narat su segretàriu de sa Cgil, Enzo Costa, cummentendi a is arresurtaus de su spricullitu de sa Procura de Lanusè, e ddu narat a pustis de s'agatada de is càscias prenas de materiali radiaotivu aintru de sa basi. Mentris sa Cgil pedit de "oberri debressi una contienda cun su Stadu po nai ca sa Sardigna no aggradessit prus nisciuna prepoténtzia", a Manca pro s’Indipendentzia precisat un'àtera borta is crupas chi tenit su "colonialismu italianu". "Sa Cisl e su Pd – scririt su Diretivu políticu de aMpI - si ponit impari a is boxis chi tzerriant e declarant chi ant a lotai cun fortza po sa serradura de su Poligonu, custu a proa de su fatu ca su colonialismu italianu est senz''e caboris e a proa puru ca no connoscit spartziduras tra centru destra e centru sinistra". In d-unu comunacau longu meda sa sinistra indipendentista torrat a costruiri totu cussu chi si tragat sa Sardigna po mori de s'ocupatzioni militari de s'area, un'ocupatzioni chi andat ainnantis de 50 annus. "Est scientificamenti avreguau - si ligit in su documetu - su fatu chi su 65% de is pastoris chi traballant ingíriu de 2,7 chilómitrus de sa Basi militari de "Capo San Lorenzo" in Quirra sunfrit de malis mandiadoris grais meda [...]. Chini teniat arrexoni? Is indipendentistas e is ambientalistas chi de sèmpiri denunciant custa situatzioni e de sèmpiri pedint chi su Poligonu bengat serrau debressi e chi bengant puru fattas is buníficas chi si depint fai cun su dinai de su stadu, o teniant arrexoni is políticus e is militaris italianus?".