"Torraus su territóriu a sa comunidadi": domínigu Die de sa Vardania in Quirra

(IlMinuto) - Casteddu, 11 de su mes''e fiàrgiu - "Trasformai su Poligonu de Quirra  sa sedi de sa Protetzioni civili prus manna de sa Sardigna. Unu furriadroxu po su territóriu sardu e ésteru". Est custa sa proposta chi su cordinadori de su Cumitau Sinonucle, Bustianu Cumpostu (Sardigna Natzione), at fattu a 48 oras de sa Die de sa Vardania: una diri de lota longa, de cunsidériu e de festa aprontada po domínigu in Quirra e in Santuidu. Sa cosa - presentada custu mangianu a s'imprenta in Casteddu - at a pigai pei a is 11.00 a fac''e su Poligonu ponedi unu brunzitu nuràgicu "A Vardania de Quirra e de sa Sardigna totu" e un'imitazioni de sa "Madre dell’ucciso" de Ciusa comenti semu de lutu, cun s'iscrita "Bos fagimus lutu Mortos de Quirra”. A s'assentadura de is duus símbolus de "Vardania" ant a sighiri su pràngiu sociali (13.00), su trasferimentu totus impari e a is 17.00 e su cunvegnu-dibbàtidu in sa saba cunvegnus de Santuidu. "Nos eus a andai ingunis - at acrarau Cumpostu - a fueddai cun sa genti e si dimadhai chini est chi est bocendi in Quirra, poita tocat a ddu frimai e tocat a cicai  de agiudai cussu territóriu poita bengat torrau a sa genti chi ddoi bivit totalmenti líbberu e puliu ". Puru Sinistra Critica sarda at fattu connosci una nota de adesioni a s'eventu de domínigu. "S'umbra de unu degógliu de istadu - scririt s'organizatzioni anticapitalista cummentendi is datus asuba de is vitimas de sa 'Sindrome di Quirra' - si format diri po diri in sa cuscéntzia de is comudadis piticheddas chi funt asuta de ricatu, in is mesas de is síndhigus e in is spricullitus de sa magistradura, po si iscriri a sa fini in sa tumba de is mortus".