Senz”e stipendiu de su mes”e austu: torrat a cumentzai sa lota de is traballantis Geas. Pcl: “Giunta trapassera”

(IlMinuto) – Casteddu, 1 de su mes''e paschixèdda - "Seus arrennescius a otèniri is risorsas po acastiai is postus de traballu de totus is oràjus". Dd'iat nau in su merì de su 28 de su mes''e ledàminis s'assessori regionali de is Trasportus, Angelo Caria, po cumbinci a is traballantis de sa Geas a lassai sa crabatura de s'istatzioni de is trenus de Casteddu. A prus de unu mesi de distàntzia is fueddus de su rapresentanti de sa Giunta regionali no si funt ancora trasformaus in fatus e is traballantis chi allichidint is trenus de sa Sardigna ant torrau a pigai sa lota: no arricint su stipendiu de su mes''e austu. Ariseru a merì esti stetiu blocau unu trenu in parténtzia de Casteddu po Santu 'Engiu. Custu mangianu, tra is 7.40 e is 8.30, is operàjus ant blocau su tràvigu de sa ferruvia in essida e in arribbu in Casteddu (seti is trenus annullaus). S'istatzioni de Casteddu est presidiada diri e noti. A is traballantis de sa Geas est arribbada sa solidariedadi de sa setzioni de Casteddu de su "Partito Comunista dei Lavoratori". "Atzionis de protesta comenti cussas mandas ainnantis de is dipendentis Geas - si ligit in d'una nota - funt necessàrias po fai cumprendi a totu is citadinus ca is traballantis funt obbligaus a patiri po mori de unu sistema chi ponit su torracontu e s'interessu de pagus ainnantis de su diritu a su traballu de milla e prus de milla personis".

Su Pcl acusat a sa Giunta regionali. "S'intendeus - precisat su documentu - de depi cundennai unu Guvernu regionali chi espressat ancora oi sa natura sua trapassera fatta de risus e prumissas falsas. Ariseru Eurallumina oi Geas".