"Ammenguaus is costus e is privilégius de sa classi política sarda". Zuncheddu presentat sa proposta de lei "anticasta" de is Rossomori

(IlMinuto) – Casteddu, 26 de su mes''e totussantus - "A fac''e sa crisi economica chi atraversat sa sociedadi sarda, sa classi política depit cumentzai a ammenguai is costus e is privilégius". Est cantu at acrarau ariseru sa consillera regionali de is Rossomori, Claudia Zuncheddu, presentendi a s'imprenta sa proposta de lei po s'irminorigamentu de is costus de sa política. Una proposta chi - atressu de sa suppressioni de is diarias e s'irminorigamentu de sa paga mensili de su consilleri regionali - iat a permiti a sa Regioni Sardigna de arresparmiai 6 o 7 millionis de eurus a s'annu: una fita chi corrispundit a casi su 3 po centu de totu sa Finantziaria regionali 2010. A oi unu consilleri regionali - at nau Zuncheddu - no pigat prus pagu de 9milla eurus a su mesi (prus de 10milla po is residentis a prus de 35 chilómitrus de Casteddu). Si sa proposta de sa presidenti de is Rossomori iat a essia provada is consilleris iant a biri assumancu smesau su "stipendiu mensili" insoru. No est totu. Sa proposta de lei previdit puru s'irminorigamentu de is viàgius cun rimbussu, su controllu rigurosu de is consuléntzias de foras e s'abbolitzioni de sa pensioni de is consilleris, cun àterus profeus po is busciacas de sa Regioni. Zuncheddu narat no in veci a s'irminorigamentu de su númeru de is consilleris regionalis de 80 a 60. Unu sceberu chi, si aprovau, iat a cumportai s'esclusioni de is fortzas políticas minoris de is istitutzionis.
Cussu chi si dispraxit meda - at precisau sa consillera regionali - est ca seus portendi ainnantis custa proposta política a solus. Sa majoria de is consilleris regionalis preferit irminorigai su númeru de is consilleris e "ndi liai" sa demogratzia".