Pastoria. Sa protesta de s’Mps arribbat in Portu Turre. Portu firmu e camion controllaus a unu a unu. Floris a Cappellacci 'in crisi': 'No ddoi est prus tempus de perdi'

(IlMinuto) – Casteddu, 1 de su mes''e ledàminis - In su mentris chi s'oberrit sa crisi de su Guvernu regionali - cun su presidenti chi arretirat is dèlegas a totus is assessoris suus - sighit senz''e pàsiu sa lota de s'Mps. Custu mangianu, tra medas bandheras sardas, pagu prus de 600 pastoris de su Movimentu de Felice Floris ant torrau a portai sa protesta insoru in sa Sardigna de tramuntana. Is allevadoris ant blocau su scalu maritumu de Pòrtu Turre, ponedi in pràtiga una forma noa de lota. Is càmiu sbarcaus de duus traghetus atracaus in su mangianu funti stetius frimmaus e cuntrollaus de is pastoris, cun s'obbietivu de agatai animabais importaus de foras, torraus a bendi fatuvatu in s'Ísula comenti prodotus sardus. In sa nai arribbada de Barcellona funti stetius agataus duus càrrigus cun brebeis e procus. "Bolleus - at acrarau su leader Felice Floris - mantèniri arta sa mobilitada puru poita seus in abetu de arrespustas beras. Est a nai de provedimentus chi diventant dógnia diri prus apretosus. Arremaciaus ca is impignus chi su guvernadori Cappellacci at pigau cun is pastoris su 14 de su mes''e cabudanni in Casteddu depint essi onoraus. Depint diventai provedimentus berus. A coitu. Poita no ddoi est tempus de pèrdiri". Ant pigau parti a sa protesta puru calencunu síndhigu de su territoriu e unu grupu de militantis de Sni e aMpI.