Pastoria. Mps: "Bolleus un'atóbiu cun Cappellacci". Cras manifestada in Casteddu. A Manca: "Tutus in pratza"

(IlMinuto) – Casteddu, 13 de su mes''e cabudanni - S'Mps lamat a Cappellacci. Su "Movimento Pastori Sardi" at dimandau de podi atobiai a sa fini de s'assembrea regionali a su presidenti de sa Regioni e de sa Giunta Regionali. Assembrea  aprontada po cras 14 de su mes''e cabudanni in sa Fiera de Casteddu (a sa reunioni at a sighiri una manifestada meda manna po is istradas de sa citadi). Sa dimanda esti stetia mandada de su leader de su Movimentu Felice Floris. "Iaus a bolli - at scritu Floris - podi concluiri cust'assembrea in Casteddu cun d'un'atóbiu cun Fustei e cun sa Giunta Sua po podi ammostai su progetu de cussu chi dimandaus e de is propostas nostras e po afrontai s'acuntéssia meda mala de is aziendhas nostras".

"Pensaus - at precisau su leader de Mps - ca un'atóbiu faci po faci si possat permiti de acrarai ancora de prus e senz''e medianeris su pranu de is dimandas nostras".

Asuba de sa contienda de sa pastoria at fueddau cun d'una nota puru sa Diretzioni de aMpI, chi narat a totus de partecipai a sa manifestada in programma cras in Casteddu.

Sa lota de is pastoris contra a su blocu de is industrialis, de is assótzius de categoria, de is centrus de su cumérciu meda mannus e de is partidus políticus italianus - si ligit in su comunicau de A Manca - at dimustrau una capassidadi meda manna de mobilitada popolari e de anàlisi. Is pastoris ant segau cun is assótzius de categoria e ant evitau de arrui in sa contrapositzioni banali tra centru destra e centru sinistra, poita ant cumprendiu ca totu sa classi política acapiada a s'Itàlia est culpàbili de su scordonamentu de s'economia sarda".