Manifestada pastoris. Mps: "Aprovaus de sa Giunta unus cantu puntus de su progetu". A Manca: "Regioni arrocada". Fresu (Prc):"Uniri is lotas, de is pàsculus a s'iscola"

(IlMinuto) – Casteddu, 15 de su mes''e cabudanni - "Su Presidenti Cappellacci, s'on. Prato e La Spisa cabant in istrada po ammostai a is pastoris is diversus puntus aprovaus de su progetu insoru sutapostu a sa Regioni". Aici si ligit in su post pubblicau in su situ Mps sardus a is 14.45 de ariseru. Custu, segundu s'interpretamentu "uficiali" de su Movimentu de Felice Floris, s'ésitu de sa reunioni de ariseru cun is rapresentantis de sa Giunta regionali a sa fin''e de sa manifestada de assumancu 5milla pastoris sardus po is bias de Casteddu. De sa chistioni ant fueddau puru su segretàriu regionali de su Prc, Gianni Fresu, e sa diretzioni de aMpI.

"Su 'Movimento dei Pastori' – scririt sa diretzioni de A Manca - at arrocau diaderus sa Regioni a pustis de unu corteu meda mannu chi at frimmau Casteddu po totu sa diri. Po blocai s'arràbiu de is pastoris in gherra, lúnis su Consillu Regionali at aprovau a s'úrtimu momentu, a is 22.40, calincunu arremédiu cun agiudus De Minimis de 15 milla eurus po aziendha".

"Po su beru - precisat sa nota - custu dinai iat a depi arribbai de sa nomenada 'contienda intradas' e no est po nudda seguru ca su Stadu italinu ndi liit su blocu asuba de custu dinai e duncas est scéti una declaratzioni de intentus po pregantai una bera e própriu scopiu de arràbbiu ainnantis de sa sedi de sa Regioni".

S'anàlisi de su segretàriu de Rifondazione comunista precisat s'acàpiu tra is diversas lotas.

"Ariseu - scririt Fresu - sa manifestada meda manna de is pastoris sardus, oi cussa de is maistus precarius e de is operadoris iscolasticus. Duus realidadis aparentementi atesu ma in sa realidadi meda acanta. Per cust'arraxoni su Prc de sa Sardigna no scéti addirit e participat a is manifestadas e a is lotas bófias de is pastoris e de is maistus precarius ma s'impignat a uniri totu is discussuras de su mundu de su traballu".