A Manca: "Sa lota tra pastoris e colonialismu est bécia de 200 annus"

(IlMinuto) – Casteddu, 9 de su mes''e austu - "Sa chistioni de is pastoris sadrus no cumenzant cun sa mobilitada in s'aereoportu de Su Masu e no si podit limitai scéti a su 'préziu, de su lati'. Po sa precisioni sa lota tra pastoris e colonialismu italianu est bécia de 200 annus e interessat s'ànima de totu s'economia e de sa cultura de sa terra nostra".
Est cantu afirmat sa Direzioni nazionali de A Manca pro s' Indipendentzia, cun d'una nota fatta connosci a pustis de sa manifestada de cenàbara passau, chi iat biu is pastoris de su Mps blocai sa 131 a s'artesa de Tramatza.
"200 annus de leis colonialistas - acrarat aMpI - impostas cun sa forza de is armas ant fattu diventai su pastori sadru unu mullidori dipendenti, in custu modu su traballu suu no serbit a fai richesa collettiva, ma serbit scéti a ammanniai su portafógliu de industrialis e políticus acapiaus a s'Itàlia e a su sistema de is bancas e de is partidus suus".
Su movimentu indipendentista e de sinistra A Manca pro s’Indipendentzia acozat a is chistionis de is pastoris e proponit "unus cantu puntus po s'iscapiai debressi de su colonialismu italianu".
Tra custus "su gosamentu a gratis de àcua e energia", "s'annullamentu de is costus de is musúngius e de is trasportus" e "s'óbbligu po is centrus de cumérciu e po is mercaus cívicus de bendi assumancu su 70 po centu de is prodotus sadrus a unu préziu giustu".