Giovani ricercatori. Zedda (Sel): “Lo dice anche la Corte europea: nessuna tassazione sui fondi Fse”

(IlMinuto) - Casteddu, 10 de su mes''e austu - Sa batalla de is istudiosus contra a su cotizamentu de is borsas de istudiu finanziadas de su "Fondo sociale europeo" intrat in su Consillu regionali de sa Sardigna.
Cun d'un'interrogazioni is tres rapresentantis de Sinistra Ecologia e Libertà (primu a ai firmau Massimo Zedda) in s'àula de bia Roma dimandant a su presidenti de sa Giunta regionali, Ugo Cappellacci, "si depit interrogai a s'"Agenzia delle Entrate" po acrarai su critériu fiscali de is borsas de istudiu po is giòvanus istudiosus".
Asuba de sa chistioni de su cotizamentu de su dinai Fse, arregordat Zedda, est finzas intervennia calencun'annu fait sa Corti de Giustízia Europea.
Cun senténzia de su 25 de su mes''e ledàminis de su 2007 sa Corti at difatis acrarau "ca su divietu de dógnia scómputu si depit assoluatamenti stendiai a totus is costus chi funt inderetura e po natura sua collegaus a is summas versadas".
A oi is 700 istudiosus pigant borsas de istudiu chi tenint unu cotizamentu Irpef comenti ddu tenint is rédditus de traballu, ma is assignus - precisat su rapresentanti de Sel - "no tenint nesciunu tratamentu previdenziali si puru funt acapiaus a un'esperiénzia de traballu comenti istudiosus prus ca a un'esperiénzia de istudiu".
"Cussu dinai - arregordat Zedda - no benit donau dógnia mesi o dogn'annu, ma in cuotas chi taliorta funt su 90 po centu de sa borsa e in d'un'única soluzioni, custu portat in cuss'annualidadi a pagai un'aliquota Irpef meda arta".