"Cabai is manus de s'ispidali de Tièsi". In Facebook funt giai 2700 is no a sa serradura de s'istrutura

(IlMinuto) - Casteddu, 16 de su mes''e làmpadas - Difendi s'ispidali de Tièsi bollit nai difendi su diritu a sa saludi de una comunidadi. Est custa sa cunvinzioni chi at portau prus de 2.700 personas a addiriri a su grupu Facebook nàsciu po nai no a sa serradura de s'istrutura. E de calincuna diri a su grupu nàsciu in su social network s'est aciunta puru una petizioni on line po su presidenti de sa Repúbbrica, su ministru de sa "Salute" e a s'assessori regionali de sa "Sanità".
"Cantus personas - iscrirint is aprontadoris - dógnia diri in su  Logudòro-Mejlogu andant a si ndi tirai su sànguni e tenint sa possibbilidadi de arretirai is arrisurtaus in 24 oras? Cantus personas dógnia diri tenint su bisóngiu de si fai una lastra apretosa e andant a Tièsi aundi no tenint bisóngiu de fai filas longas e tenint is arrisurtaus in dexi minutus?". "Bollint serrai s'Ispidali - aclarant is aprontadoris - po calincunu disignu políticu chi scéti is potentis cumprendint".
Ma cali funt is dimandas de is promotoris de sa petizioni? "S'ispidali de Tièsi - iscrirint - depit abarrai obertu e in pei in dógnia modu. Una bintina de letus, unu prontosoccorso chi funzionit, una saba po is operazionis apretosas, unu repartu po is lastras, po sa tac e is mamografias, senz''e depi andai in Tàtari o in àterus logus faendi puru filas meda logas".