"Associazione Sardegna Palestina": "Su guvernu de Israeli s'est ammantau de infàmia". Custumerì a is 18.00 sit in in Casteddu

(IlMinuto) – Casteddu, 1 de su mes''e làmpadas - "Un'atu terroristicu bàrbaru e miseràbbili chi passat asuba de dógnia prus pitica norma de umanidadi po afirmai sa forza maba de unu stadu chi no si fait nesciunu iscrúpulu a imponni a sa marolla e cun is armas cantu no dd'apartenit po diritu". Cun custus fueddus s'assóziu "Amicizia Sardegna Palestina" cundennat sa strossa - de su noti tra su 30 e su 31 de su mes''e maju - de 19 civilis chi furiant in d'una de is nais de sa Flotilla Freedom: missioni chi bolliat portai agiudus umanitarius in sa Striscia de Gaza forzendi is blocus militaris. Sa nai, batenti bandhera turca, furiat in àcuas internazionalis candu esti stetia atacada de sa Marina israeliana (fonti Peacereporter).
"In solidariedadi cun is mortus e is ferius e contra a su terrorismu israelianu", "Sardegna Palestina" at aprontau unu sit in de protesta, in programma custumerì in Casteddu (18.00, Bastioni de San Remy).
"Sa nai - arregordat 'Sardegna Palestina' - portàt asuba un'imbasciada fatta de genti meda chi beniat de meda logus, un'imbasciada internazionali chi furiat partia in is diris passadas po portai agiudus materialis de importànzia vidali po sa genti de Gaza e po denunciai sa cundizioni disumana in sa cali su stadu de Israeli, in su totali abbandonu de sa comunidadi internazionali, mantennit unu pópulu intreu".
 "Su governu israelianu - si ligit in d'una nota - oi s'est ammantau de infàmia e contra de cussu si depit arziai únia sa mobilitazioni paxiosa de totus is democraticus de dógnia parti de su mundu".