"Una firma po Bellomonte": su "minatore rosso" promovit un'apellu contra a su lissenziamentu de s'indipendentista de Trenitalia

(IlMinuto) – Casteddu, 13 de su mes''e maju - "Per Bruno Bellomonte reintegro e libertà subito!". Cun custus fueddus s'imbasciadori de su comitau "Lavoratori pro Bellomonte", "il minatore rosso" Antonello Tiddia, at donau su cumenzu a una petizioni nazionali po agiudai su ferrovieri lissenziau de Trenitalia, arregollendi in pagus oras centinas e centinas de firmas. "Prus de su dannu sa befa", precisat Tiddia. "A pustis de unu presonamentu preventivu ingiustu est arribbau puru su lissenziamentu. Bellomonte - arregordat "il minatore rosso" - furiat stetiu arrestau su 10 de su mes''e làmpadas, pagu primu de su G8, in Sardigna (a pustis fattu in s'Aquila) in d'una dúbbia operazioni chi teniat s'iscopu preventivu, senz''e provas e senz''e indízius berus, e est ancora abetendi su giudíziu".
"Bruno - acrarat - est unu ferrovieri capustazioni in Tàtari, unu militanti de is lotas in Sardigna tra is prus stimaus e connotus po antiga militanza sociali e sindacali. Est unu personàgiu púbblicu chi no at mai tentu nudda de cuai e oi puru candidau a síndhigu de Tàtari".
"Aprofitendi - osservat s'aprontadori de s'apellu - de su stadu de debbilesa de Bruno Trenitalia dd'at lissenziau mandendiddi una lítera in su presoni de Sianu, nonostanti no siat mai stetiu cundennau, arregordaus ca Bruno est abetendi su giudíziu".

Po addiriri a s'apellu: tiddia.ant@gmail.com

Po ndi sciri de prus: http://ilminatorerosso.blogspot.com/

Po ligi totus is novas chi chistionant de Bellomonte: http://www.ilminuto.info/ricerca.php?ricerca=bellomonte