Riforma Gelmini: sa "furriada" de is scienziaus. Fanfani: "in Casteddu funt in perígulu diversus cursus de istudiu"

(IlMinuto) – Casteddu, 28 de su mes''e maju - S'Universidadi de Casteddu si preparat a un'atóngiu diaderus callenti. Dógnia diri su no a is tàglius de sa riforma Gelmini arregollit cunsensus tra is istudiantis, is maistus e, prusatotu, tra is istudiosus: no fasidus a pigai incàrrigus didaticus (casi sèmpiri no pagaus) po s'annu académicu chi benit. "Prus de 50 istudiosus de sa Facoltadi de "Scienze" de Casteddu (po unu nùmeru de 70 istudiosus pagu prus) - at nau ariseru su físicu Umberto D'Alessio in d'una cuferénzia de imprenta - ant declarau in modu uficiali de no bolli pigai incàrrigus de imparamentu po s'annu académicu chi benit".
S'ausenzia de is istudiosus in s'imparamentu at a podi ponni a arriscu medas cursus de laurea.
"Senz''e su contribbutu de is istudiosus - at acrarau su présidi de "Scienze" Luca Fanfani - s'oferta de istudiu est dubbiosa. Un'impiticamentu de s'oferta disatica bófia a sa marolla de su Guvernu e imposta de fatu a s'Universidadi de Casteddu e a sa Facoltadi de "Scienze" at a foniri po ndi liai a sa Sardigna medas cursus de istudiu in campu ténnicu-scientíficu".
Sa chistioni interessat totu s'Universidadi italiana. Su 6 de su mes''e maju sa Cuferénzia nazionali de is presidis de is Facoltadis de "Scienze" at difatis aprovau a s'unanimidadi una mozioni (po 52 ateneus ndi ddoi furiant 32) de dinúnzia po is apretus malus causaus de su tàgliu a is risorsas e po s'ausenzia de s'arreconnosciméntu professionali de is istudiosus.