Gig e Adt: "Toca a ndi bogai su 'linnàrgiu' abbusivu de s'Anfiteatru romanu"

(IlMinuto) - Casteddu, 27 de su mes''e maju - Su "linnàrgiu" chi ammantat s'Anfiteatru romanu de Casteddu depit essi bogau poita "est abbusivu po su paesagiu". Est cantu narant su "Gruppo di interventu Giuridico" e is "Amici della Terra". Martis passau, a pagus diris de su cuminzu de sa stagioni noa de is ispetàculus, is duus assózius chi s'impiciant de is chistionis de s'ambienti ant pediu, faendi un'espostu in sa Procura de Casteddu, su "secuestru anticipau" de s'Anfiteatru e de is atrezaduras.
"S'est faendi un'abbusu ananti a is ogus de totus. In Casteddu, est - narant Gig e Adt - su linnàrgiu meda malu chi de tropus annus impestat s'Anfiteatru romanu, su prus importanti monumentu romanu de s'Isola, unu de is tres anfiteatrus romanus scavaus in sa roca chi esistint ancora in su mundu. Su permissu paesagisticu (po podi sighiri a tenni su linnàrgiu, ndr) est scadèssiu de cinc'annus: dd'at nau prus de una borta su 'Servizio regionale tutela paesaggistica' de Casteddu".
"No est scéti chistioni - aclarant is assózius - de avalorai sa bellesa, frutu de unu giudíziu personali: sa mancànzia de permissus depit essi pagada e is òperas abbusivas depint essi bogadas".
Po custu su Gig e s'Adt ant pediu a su "Ministero per i Beni culturali", a sa "Direzione regionale per i Beni culturali e il Paesaggio", a sa "Soprintendenza archeologica", a sa "Soprintendenza per i Beni ambientali" e a su "Servizio regionale per la Tutela paesaggistica" de ndi liai cun sa forza "is istruturas po is ispetàculus chi no tenint prus su permissu paesagisticu de medas annus".