"Fàbbrica iscola": in su 2010/2011 tàglius po 1.819 postus de traballu in Sardigna. 11 e 12 de su mes''e làmpadas isciòpiru de is scrutinus

(IlMinuto) – Casteddu, 18 de su mes''e maju - S'annu iscolasticu 2009/2010 s'at a serrai cun duas diris de mobilitazioni. Is Cobas ant difatis proclamau s'isciòpiru de is maistus e de is traballantis Ata po s'11 e su 12 de su mes''e làmpadas: ant essi blocaus is scrutinus e s'ant a firmai totus is atividadis de s'iscola.
A sa proposta de su sindacau de basi ant addiliu su "Coordinamento precari della Scuola di Oristano": in su 2010/2011, po mori de sa riforma "Gelmini", in Sardigna ant essi difatis liaus àterus 1.819 postus de traballu in sa "fàbbrica istruzioni" (anàlisi Cobas in basi a is datus de su Miur).
"Su peschentu totali de is tàglius in Sardigna - acrarant is Cobas - s'at a acostai a s'8 po centu. Su peschentu prus artu in Italia".
"S'annu iscolasticu - scririt in d'una nota su Cordinamentu de is precarius aristanesus - arribbat a sa fini e est in su mes''e làmpadas ca tocat pigai unu determinu forti. Sa classi de is maistus e de is Ata est scontendi sa riforma ma no cun sa mandronia chi si bollint fai crei: medas realidadis traballant de meda tempus senz''e otèniri s'ispaziu necessàriu chi iant a depi tenni in is media".
"Est in dognia modu necessàriu - precisat su documentu - allargai e fai diventai ativa sa participazioni. Chini est contra a custa riforma ddu depit dimustrai. Cun is fattus".