Elezionis. Palomba (Idv) po sa candidadura de Milia: "Un'eventuali cundenna podit determinai primu de su tempus sa fini de sa legisladura"

(IlMinuto) – Casteddu, 7 de su mes''e maju - "Mentris po unu calisisiat cuncursu in sa Púbbrica amministrazioni est dimandau a su citadinu de tenni una fedina penali cristallina e nesciuna chistioni pendhentina cun sa giustízia, custu parrit no balli po sa política bécia, chi no si preocupat, a diferénzia de is eletoris, ca s'eventuali cunfirma de una cundenna pozat determinai su decadessimentu de s'incàrrigu e sa fini, primu de su tempus, de sa legisladura cun noas e caras elezionis".
Est cantu afirmat cun d'una nota su candidau a sa presidénzia de sa provìnzia de Casteddu de s'"Italia dei Valori", Federico Palomba, donendi sa crupa a su Partito Democratico de su fattu ca no ddoi esti stetiu un'acórdiu eletorali in sa zona de Casteddu".
"In Casteddu - precisat su parlamentari - su Pd no at acetau s'indicu de una candidadura chi podiat andai beni a totus e chi depiat essi diversa de cussa bófia a sa marolla, traghendusia apabas àterus partidus chi primu, in su principiu de cosa, furiant stetius meda ingurdosus a pigai s'istrada de custa soluzioni".
"'Italia dei Valori' e su candidau presidenti Federico Palomba - afirmat s'ex presidenti de sa Regioni - ant a salvai su centrusinistra e sa legisladura provinziali, poita rapresentant su furriadórju de medas citadinus chi ant essi abarraus in domu si no iant tentu unu sceberu balidu a su candidau bófiu a sa marolla de su 'Partito Democratico'".
"No seus ispantaus - concluit - de su nùmeru de listas chi acozant Graziano Milia: sa coerénzia no est acapiada a is nùmerus".