Elezionis: Arbau bogau de su Pd. Barracciu amalezat de si nci andai: "Si necessàriu seus a andai in Tribbunali"

(IlMinuto) – Casteddu, 13 de su mes''e maju - Est arrumpellamentu in su "Partito Democratico" contra a sa bogadura de Efisio Arbau, su síndhigu de Ollolai candidau in sa provìnzia de Nùgoro contra a s'amigu de partidu Roberto Deriu. In difesa de su "ribbelle" si stringint is deputaus Guido Melis, Caterina Pes, e Antonello Soro, su senadori Giampiero Scano e sa consillera regionali Francesca Barracciu.
"Sboddicai una chistioni chi est scéti política cun dispostas de dissiprina - scrirint is parlamentaris - est un'atu gravi de stalinismu.
Traballai in custu modu e in d'una cundizioni comenti cussa sadra, aundi su Pd est nascendi, est de seguru sballiau. Bogai dexinas de dirigentis a sa vigília de su votu, est puru a si donai sa marra a is peis, poita noxit a calisisiat possibbilidadi de acórdiu benidori chi s'iat a depi fai po is segundas votazionis.
Francesca Barracciu arribbat finzas a amalezai de si nc'andai. "M'apellu - scririt - a su segretariu regionali e a cussu nazionali poita custa decisioni bengat arritirada debressi. Chi no fessat aici eus a portai sa chistioni a fac''e sa commissioni nazionali de 'garanzia' e abetendi sa sceda deu 'e totu mi nci bogu de su pardidu, ma seu segura ca puru s'emorragia de tesseraus no at a podi essi istransida. Inútili precisai ca custa borta eus a essi nos, si necessàriu, a andai in su Tribbunali civili".