Cumpostu (Sardigna Natzione): "No seus a presentai a is elezionis provinzialis e no eus a votai chini dividit is indipendentistas. Irs no est sa bardiana de sa beridadi".

(IlMinuto) - Casteddu, 16 de su mes''e arbili - In is ischedas po is elezionis provinzialis de su 30 e de su 31 de su mes''e maju no dd'at essi su símbolu de Sardigna Natzione Indipendentzia. Pighendi cuscénzia de s'ispacadura in ses partis de su fronti de is idipendentistas, su movimentu de Bustianu Cumpostu sceberat de cuncentrai s'impignu de cuss'etotu po su referendum contra a su nucleari in s'Isola.
Po is elezionis provinzialis - ispiegat Cumpostu in sa cuferénzia stampa de custu mangianu in Casteddu - no esti stetiu possíbbili fai un'unioni tra cussus chi si lamant indipendentistas. Irs, difatis, cumbinta de essi sa bardiana de sa beridadi po s'indipendentismu, at vitau s'imbidu a s'unioni cun Sni. Su Psdaz e is Rossomori ant imbecis sceberau de sighiri a fai is ghias indianas de is polus italianus a is calis funt acapiadas".
"Cun is fueddus - ispiegat su leader de Sni - totus custus chi eus nominau funt indipendentistas, perou, in is fattus, no scéti no faint nudda po presentai a is sadrus una proposta de unidadi in sa cali sa genti possat crei, ma favoressint puru is unionis de is partidus italianus e in prus lassant campu obertu a s'intrada de sa Lega Nord  in sa política sadra. Po custu Sni imbitat a is sadrus a no donai su votu insoru no scéti a sa Lega Nord, partidu coloniali nou, ma puru a cussu partidus chi, si puru narant de essi indipendentistas, arrefudant is alleànzias e arrematant s'indipendentismu, favoressendi is partidus italianus".
Usendi is fueddus de Aurora Pigliapochi, a sa cumparzidúra de magineddas po is elezionis Sni preferit cuncentrai s'impignu suu contra a su necleari in s'Isola. "Azionis beras imbecis ca promissas po is elezionis", narat Cumpostu. S'iter de su referendum regionali difatis andat ainnantis.
"Atressu novas chi no funt formalis - ispiegat su cordinadori - eus difatis scipiu ca s'Ufíciu regionali po su Referendum at finiu su traballu de berífica de is casi 17milla firmas arregotas e at comunicau is documentus a s'Ufíciu de sa Presidénzia de sa Regioni, cun sa cali eus giai fissau un'apuntamentu po gióbia 22 de su mes''e arbili a is 17.00 po cuncodrai una data po su referendum".