Claudia Zuncheddu (Rossomori): "Is italianus chi bollint sa guerra depint cabai is manus de Emergency, 'testimóngiu incómodu'"

(IlMinuto) - Casteddu, 23 de su mes''e arbili - "Po is 'italianus chi bollint sa guerra' in Afganistan, s'arrestu de pagus diris fait de tres dotoris, esti stetia un'ocasioni po cumbàtiri  Emergency, 'testimóngiu incómodu'". Est cantu narat Claudia Zuncheddu - consilleri regionali, presidenti de is Rossomori e datori - in d'unu post pubblicau in su blog de cuss''e totu e chi tenit po títulu "Cabai is manus de Emergency".
Sa sardista de sinistra arregodat de ai connotu Gino Strada candu fiat giòvunu, meda annus fait.
"Dd'apu connotu - ispiegat Zuncheddu - in su repartu de 'Chirurgia d'Urgenza' de su professor Staudacher cun su cali apu tentu abbitazioni po calincunu annu. Dd'arregodu in sa saba po is operazionis 'a conca bàscia', impignau in d'una operazioni meda difícili. A pustis de medas annus Gino Strada sighit 'a conca bàscia' a salvai vidas umanas, no prus in is sabas de su Policlinico de Milanu o in Città del Capo o in is Usa o in Gran Bretagna, ma fatuvatu in 'ispidalis de campu' pòberus, chi funt in is zonas prus disisperadas de su mundu e in guerra".
"Su disacórdiu suu contra a sa guerra - aclarat - dd'ammostat dognia diri candu salvàt milla e milla vidas umanas. A Gino Strada, chirurgu de guerra, e a totus is collegas suus, chi si cumportant comenti "defesas umanas" po is prus pòberus, contra a su machímini de sa guerra, nos ddi depeus scéti 'arrispetu'. S''arrispetu' giustu po chini salvat sa vida de is àterus e, faendiddu scéti po doveri morali, donat unu sensu a sa vida sua. A Gino e a is collegas chi operant in trinceramentu nos auguraus una vida longa".