Agcom: "Nesciuna reza regionali in is primus 9 canalis de su 'digitale terrestre'". Giudici: "Pompiu sa batalla de is mezus de comunicazioni localis"

(IlMinuto) - Casteddu, 28 de su mes''e arbili - "Sa decisioni de s'Agcom, garanti po is comunicazionis, de assegurai i primus noi postus in televisioni a is canalis nazionalis fait arrui un'àtera téula asuba de sa televisioni regionali chi est giai casi in genugu po mori de s'intrada de su 'digitale terrestre'". Est cantu denunziat su grupu Facebook "Salviamo Videolina nei primi nove canali", chi at arregotu finzas a custu momentu 1.589 iscritus. "Nesciunu canali sadru - si ligit in sa presentada de su grupu in su social network - at a podi essi registrau in is canalis chi tenint scéti una cifra e s'ant a depi acuntentai, si fadeus ipótesi positivas, de is postus de su décimu canali a su dexennoesimu".
Po custa decisioni - chi tocat puru Sardegna Uno -  Alessandra Giudici, presidenti de sa Provìnzia de Tàtari cun d'una nota narat cussu chi pensat. "Sa televisioni privada locali - scririt Giudici - est in Sardigna una risorsa a sa cali no podeus renunziai e un'esémpiu importanti de informazioni plurali. Ananti a su perígulu de isciarrocai is canalis sadrus privaus, s'arrolu miu mi imponit de declarai cun claresa e cun cunvinzioni s'apógiu miu po sa batalla de is televisionis de s'Isola in modu de firmai dognia decisioni chi arrischit de impediri in modu gravi de fai informazioni".