Zuncheddu (Rossomori): cun su dl "salva liste" seus arribbaus a unu "fascismu nou"

(IlMinuto) – Casteddu, 11 de su mes''e marzu - "Seus in d'unu tempus aundi su 'fascismu nou' est legítimu, unu fascismu passau atréssu s'assensu afartau de su prus artu rapresentanti de su Stadu Italianu". Aici sa consillera regionali, de calencuna diri a sa presidenza de is Rossomori, definit cussu chi lamant decretu "salva liste" aprovau de su Guvernu po agiudai sa presentada de su Pdl in su Laziu e in Lombardia. "Su Presidenti Napolitano - precisat Zuncheddu - firmendi su dl 'salva liste' de Berlusconi, at difendiu su profanamentu de is arrégulas democraticas e at decretau sa trisinadura de unu sistema intreu. Ddoi est su bisóngiu de si dimandai ita podit ai ispintu su Presidenti de sa Repúbbrica italiana a renunziai a su própriu cómpitu chi est primu de totu cussu de custòdi de sa Costituzioni e si no iat nau si a is cumandus apretosus de unu 'poderi forti', ita iat essi acadessiu?"
"Napolitano - concluit sa sardista de sinistra - cun sa própriu firma donat a is italianus e a nosu sadrus unu signali de arrutroxa cedendi a su pesanti ammalezu de Berlusconi po no salvai nudda, ansis, po decretai su sciúsciu definitivu de sa repúbbrica italiana".