Muledda (Rossomori): "Alleànzia de fortilesa po sa difesa de sa Costituzioni"

(IlMinuto) – Casteddu, 9 de su mes''e marzu - "Is Rossomori lamant a sa mobilitazioni is próprius militantis, is tifosus e is democraticus de sa Sardigna, a difesa de sa Costituzioni democratica". Est cantu at declarau su segretariu nazionali nou de is Rossomori, Gesuino Muledda, cummentendi su decretu aprovau de su Guvernu po autorizai sa presentada de is listas de su Pdl in su Laziu e in Lombardia.
"In custu momentu - at nau Muledda - de afracada a is garanzias de echilíbbriu democraticu, arrancadas de sa majoría chi guvernat s'Italia cun is decretus de apretu in matéria eletorali, abbisongiat agatai is collegamentus possíbbili tra is forzas politicas circhendi una prus manna alleànzia civili, soziali e politica; alleànzia de fortilesa po sa difesa de sa legalidadi reprubbicana".
"Sa circustànzia politica de primu de is elezionis, is acórdius tra is partitus po sa costituzioni de is alleànzias po is prossimas elezionis amministrativas - at ispiegau su leader de is sardistas de sinistra - no podi essi de impíciu a s'impignu unitariu po sa difesa de sa democrazia. Rossomori, duncas, bollit  fai unu proponimentu a is Segretarius regionalis de is partidus de su centru sinistra, e a is movimentus indipendentistas, un'atóbiu (...) po concordai is formas necessàrias de mobilitazioni".