Fresu (Prc): "A foras de is candidaduras chi at tentu cundenna penalis"

(IlMinuto) – Casteddu, 16 de su mes''e marzu - Esclúdiri de is candidaduras is personas "chi apant tentu cundennas penalis, est a nai chi apant tentu cundennas po reatus contras a sa pubblica amministrazioni". Est cantu pedit - cun d'unu documentu aprovau domìnigu passau cun 29 votus a favori e noi renúnzias a su votu - su comitau politicu regionali de su Prc castiendi a is elezionis amministrativas de su mes''e maju. Su pensu de Rifondazione iat a podi tenni cusseguénzias po is candidaduras in sa Provìnzia de Casteddu, aundi cida passada su presidenti Graziano Milia esti stetiu cundennau a un'annu e cuatru mesis po aprofitu de ufíciu.
In su testu aprovau - ispiegat su segretariu regionali de Rifondazione comunista Gianni Fresu - "arremaciaus s'assoluta importànzia de s'afortiamentu de un'alleànzia programmatica de is forzas democraticas sadras. Un'alleànzia regionali chi no depit essi fatta cun su Psdaz e cun s'Udc, partidus chi ant fattu binci su Guvernu de Cappellacci.
De su Prc sadru arribbat unu no senz''e torrada a unu possíbbili acàpiu eletorali cun custus partidus.
"Primu de sceberai is nòminis pensaus chi siat necessàriu - precisat su segretariu - costruiri un'acórdiu programmaticu chi ispieghit beni sa nostra línia". Cun custu obbietivu Rifondazione proponit de fai, "senz''e abetai meda", tres eventus-dibbatidu chi tenint comenti tema sa difesa de sa Costituzioni, su nucleari e is energias rinnovabbilis, sa batalla a su disimpreu e a sa poberesa.
"Cufromma a su programma - concluit Fresu - depit essi iscritu unu documentu políticu" chi ispieghit e fissit "is critérius éticus e is modus democràticus, modus atressu is calis s'arribat a su sceberu de is rapresentanzas amministrativas".