Comitadu Psls: "Sa Provìnzia de Casteddu at depiu torrai a donai a su Stadu 546milla eurus po sa tutela e s'avaloramentu de sa língua sadra"

(IlMinuto) - Casteddu, 18 de su mes''e marzu - "Sa Provìnzia de Casteddu at depiu torrai a donai a su Stadu, poita non est arrenèscia a ddu spèndi, totu su dinai púbbricu (367.000,50 eurus in su 2005, 149.000,25 in su 2006 e 30milla in su 2007) chi iat otentu cun s'impignu de dd'usai po sa tutela e s'avaloramentu de sa língua sadra e lassendi senz''e tutela is citadinus chi chistionant scéti su sadru in sa Provìnzia 'e totu". Est cantu denunziat cun d'una nota su Comitadu pro sa limba sarda. Po su própiu tema at nau calincuna cosa puru su senadori Piergiorgio Massidda (Pdl), chi at cummentau sa presentada de is arrégulas de ortografia e de fonética de su campidanesu fatta in is diris passadas de su presidenti de sa Provìnzia de Casteddu, Graziano Milia.
"Un'atuamentu fattu po in elezionis - ispiegat Massidda - po fai iscaresci a is citadinus ca funt stetius torraus a su Stadu 546milla eurus chi no funti stetius spèndius po sa mancanzia de abbilesa a fai progetus in custu campu".