Petrolchímicu de Pòrtu Turre. Sabino (aMpI) : "Nesciuna recumpensa po chini esti stetiu bociu de is colonialistas"

(IlMinuto) - Casteddu, 22 de su mes''e fiàrgiu - "Comenti sempiri si cunfirmat sa tesi segundu sa cali sa conca e su brazu italianus funt acapiaus beni beni s'unu cun s'ateru". Est cantu narat cun d'una nota (chi tenit unu títulu prenu de sinnificau: "La giustizia italiana e gli operai sardi") s'eponenti nazionali de A Manca pro s'Indipendentzia, Cristiano Sabino, cun su cummentu a sa decisioni de su giugi po is udiénzias "preliminari", Gianni Delogu, chi at bullau sa dimanda de is parentis de 28 operàjus, casi tutus mortus, po si costituiri parti civili in su processu contra a is diretoris de is istabilimentus Syndial, Ineos (imoi Vinyls) e Sasol de Pòrtu Turre, po su sciasciu de s'ambienti, s'impestadura de is àcuas e ateras cosas. "A pustis de sa morti de is parentis insoru, su giugi is de udiénzias "preliminari" Delogu at, difatis, bullau - narat Sabino - sa dimanda de is fiudas e de is òrfanus de is operàjus de su Petrolchímicu bocius po unu tumori a pustis de una vida passada a respirai velenus in s'istabilimentu de Pòrtu Turre (...) de si podi costituiri parti civili in su processu po is parentis insoru, faendiddu fai in veci (cosa istrambeca meda) a sa Provìnzia de Tàtari".
"Nesciuna recumpensa duncas po chini esti stetiu bociu de is colonialistas. Custu e no ateru - finit Sabino - si depeus abetai de custus sennoris e de is brazus politicus insoru in Sardigna: sfrutamentu, morti e senténzias de "non luogo" a sighiri in d'unu contestu generali de spopolamentu, pérdida de cultura, disimpreu e emigrazioni".