Irs no addirit a s'isciòpiru de su 5 de su mes''e fiàrgiu. "Toccat a dd'acabbai cun su teatreddu de is sindacaus italianus. Ddoi est su bisóngiu de trasformai sa produzioni"

(IlMinuto) – Casteddu, 2 de su mes''e fiàrgiu - S'Irs no at a participai a sa manifestazioni boffia de Cgil, Cisl e Uil in ocasioni de s'isciòpiru generali de su 5 de su mes''e fiàrgiu. Su movimentu indipendentista, si podit liggiri in d'una nota, "est cun totus cussus chi in custas diris bint ammalezau su própriu postu de traballu (...), ma no podit addiriri a sa manifestazioni de su 5 de su mes''e fiàrgiu boffia de is sindacaus poita ddu su bidi còmplicis de unu sistema guastu". Indipendentzia Repubrica de Sardigna incurpat su modellu de isvilupu de is ùltimus 40 annus. "Su modellu industriali chi est abarrau in vida in modu artifiziàli finzas a oi - precisat Irs - est unu fallimentu". "Assisteus - sighit sa nota - ancora a su teatreddu de is sindacaus italianus in Sardigna chi faint santa s'azioni de su guvernu italianu e de cussu regionali, senz''e castiai a unu modellu de produzioni diferenti". Su movimentu de Gavino Sale no creit ca s'industria pozzat torrai a incarrerai e proponit, in veci, de partiri de sa bonífica de su territoriu po podi mudai sa produzioni, "Unu cambiamentu - spiegat Irs - chi avalorit is risorsas de su territoriu, is forzas produtivas sanas e permanentis chi teneus, senz''e "assistenzialismo", senz''e parzialidadis politicas".