Alcoa custumerì vertici Guvernu-Azienda. 500 operàjus in Palazzo Chigi annunziant sa mobilitazioni senz''e fini e Crabònia si firmat

(IlMinuto) – Casteddu, 2 de su mes''e fiàrgiu - S'atóbiu, un'ateru tra Guvernu e s'Alcoa at cuminzai a is 20.30, ma sa mobilitazioni senz''e fini de is 500 operàjus de s'Alcoa de Portovesmi - chi ant a passai sa noti a facc''e su Palazzo Chigi - est giai cumenzada. "No ant a torrai a domu de Roma senz''e sa certesa de su traballu", ant declarau cenàbara passau a sa fin''e de s'ocupazioni de s'aereoportu de Casteddu. Oi, in Roma, a is operàjus de Portovesme si funt unius 200 traballantis de s'istabilimentu de Fusina in Venetu. In su Surcis, comenti arregordau prus de una borta, funt circa 2milla is postus de traballu a arriscu. Po nai no a sa serradura custu mangianu s'est firmada totu Crabònia. A s'insigna de su slogan "Serrai oi po no serrai cras", totus is attividadis de sa cittadi funti stetias suspéndias po calincua ora. "Seus in d'una situazioni soziali de apretu malu", scririt sa direzioni regionali de su Pd. "Su Guvernu - si podit liggiri in su documentu fattu connosci de su Partito Democratico - depit donai arrespustas claras e certas in méritu a una chistioni chi no podit prus abetai. Serbint agiudus berus, chi siant capazis de no fai serrai s'Alcoa". Po su Partito di alternativa comunista s'unica istrada chi si podit praticai est in veci est cussa de sa mobilitazioni de is operàjus. "Est scéti cun sa lota - scririt sa sezioni de Casteddu de su Pdac - est cun is azionis fortis e senz''e si firmai (...) finzas a s'ocupazioni de is fàbbricas, est penzendi a s'isprópiu de is logus de traballu po manu de is operàjus chi si podit evitai sa serradura de is fàbbricas".