"L'alligatore" torrat in Sardigna. Carlotto: "Sardigna terra de riciclaggiu de sa mafia russa"

(IlMinuto) – Casteddu, 6 de su mes''e ledaminis - Torrat Massimo Carlotto. A pagus mesis de su trasferimentu a Padova, sa propriu cittadi, su scrittori venetu est torrau in Sardigna - aundi at biviu po prus de dex'annus - po presentai s'ùltimu liburu scrittu, "L'amore del bandito". Traballu chi, a pustis de un'interrumpimentu de sett'annus, torrat a su ciclu de s'"Alligatore" e tenit comenti protagonista su dectective senza lissenzia Marco Buratti. Carlotto at presentau su noir nou a is lettoris casteddaius in d'unu atobiu chi s'est tentu in is diris passadas in s'Exmà. "Seu torrau a su ciclu de s'"Alligatore" - at spiegau - candu apu agatau s'istoria giusta. Diversamenti de is autoris americanus apu dezzidiu de fai imbecciai is protagonistas, seghendi is pontis cun su modellu de su personaggiu sempri uguali a cuss''e totu". Cun "L'amore del bandito" - primu parti de una trilogia - Carlotto, ancora una borta at osservau beni is cambiamentus de sa criminalidadi oraganizzada. "Apu boffiu spiegai - at nau - cussu chi est sussedendi in su Nord Est de s'Italia, aundi s'est creau unu cartellu, dominau de sa mafia Kosovara, chi controllat sa lacana: sa porta aundi intrat e bessit dognia diri sa merci illegali de s'Italia". Carlotto, sollizitau de is lettoris, at fattu puru un'esami de sa presenzia de sa criminalidadi organizzada in s'isola. "Sa Sardigna - at nau - est  una terra de riciclaggiu particulari, comenti totu s'area mediterranea. In su Nord de s'isola funt arribbaus is russus e comporant in modu meda disinvoltu".