Politica: asuta de su palazzu de viale Trento s'inchietudini de is operàjus

(IlMinuto) - Casteddu, 22 de su mes''e lampadas - S'oberrit cun sa protesta de is traballadoris s'istadi de sa Giunta Cappellacci. Custu mangianu, cun is banderas de Cgil, Cisl e Uil at pigau s'aviu sa protesta de is operàjus po tres vertenzas diversas: is operàjus de sa Portovesme srl, is minatoris de Futtèi e is operàjas chi pulint is ufícius de sa Regioni. Is traballantis de sa Portovesme srl, chi ant primu firmau su passàgiu de is màchinas in viale Trento e a pustis ant ocupau su passadissu de su palazzu, pedint a sa Giunta de mantenni s'impegnu e ponni in su collegato de sa Finanziaria regionali s'autorizzazioni a s'autoproduzioni de s'energia eolica (custu iat a permittiri de salvai medas postus de traballu). Pretendint su "respetu de is impegnus" puru is minatoris de Futtèi: centu e prus de centu is traballantis chi abetant s' antízipu de sa cassa integrazioni de parti de sa Regioni. In custus mesis, tocat ddu nai, funti stetius is minatoris a agiudai a s'ambienti evitendi s'impestadura de is terrenus confinantis. Legìtima puru s'inchietudini de is féminas chi faint is pulizias: "de casi duus annus - at ispiegau Monica Porcedda de sa Cisl - centu e prus de centu personas abetant de torrai a traballai, comenti promitiu de sa Giunta de Renato Soru candu esti stetiu introdùsiu s'appaltu nou".
No s'est tenta in veci, forsis po is diversas manifestazionis de oi, s'annunziada protesta de su movimentu Master and Back.