Arga, bene sa diferentziada in Sardigna

Est de s’80% s’obietivu de diferentziada programmadu pro su 2029, ma su 2023 sa Sardigna nch’est giai lòmpida a su 76,3%. Medàllia de brunzu a pustis de s’Emìlia-Romagna (77,1%) e de su Vènetu (77,7%, semper datos Ispra). Custu su datu de sas provìntzias cun sa de Aristanis chi nche bàrigat giai dae como s’80% (81,3); su mègius datu provintziale de Itàlia est su de Trevisu cun s’89,1%. Prus in bassu, e manu-manu calende, b’amus sa de Nùgoro (79,6), sa de su Sud Sardigna (79,4) e, in finitias, sa de Tàtari (71,1). Bonu su datu de sa tzitade metropolitana de Casteddu chi, cun su 78,2% suo est sa prima in totu Italia. Male sa tzitade de Tàtari chi, pro neghe de ritardos atuende su servìtziu de regorta diferentziada, si firmat petzi a su 60,96%.