Prèmiu Ondras, reconnoschimentu fintzas a sa comunidade de Orgòsolo

Sa comunidade de Orgòsolo retzit ocannu unu de sos reconnoschimentos de su Prèmiu Ondras de sas Acli e lòmpidu a sa de tres editziones. Una conchista colletiva pro s’esempru chi est dende a sas àteras biddas pro more de su mantenimentu de sa limba. «S'impreu de su sardu – leghimus in sas motivatziones de sos giurados Pepe Coròngiu, Nicolò Migheli e Maria Antonietta Piga - iscumparet fintzas in sas biddas de s'internu. Sas famìlias a s'ispissa abbandonant sa limba pròpia de s'ìsula colende·nche a s'italianu cun unu ritmu e una lestresa impressionantes. Zonas mannas de Sardigna sunt oramai privas de una trasmissione intergeneratzionale dèghida, ma pro fortuna b'at logos e biddas chi non sighint custa règula». A bisu de sa Giuria, «su tzentru in ue custa resistèntzia linguìstica est prus forte de àteros logos est Orgòsolo chi, cunforma a su chi narant sos osservadores, mantenet custa particulare ghia in Sardigna sena cuncurrentes aparentes». Custos sos àteros premiados: s’iscritora e filòloga basca Castillo Suarez Garcia, Pantaleone Danilo Brancati de sa comunidade grecànica, su giornalista Franco Siddi pro s’impreu de su sardu in Rai. Ondras est unu prèmiu naschidu pro avalorare sas limbas minoritàrias europeas. Sa manifestatzione l'ant a fàghere su 26 de custu mese in Casteddu.